JC in UK 英倫生活記: 移民英國難唔難適應？

不時有人問，移民英國難唔難適應？

又或者, 問我, 你用左幾耐時間去適應英國?

我成日諗，有咩要適應呢？

我日日同香港既屋企人講電話，成日講一個鐘都未收線，而兩個仔會同爺爺嫲嫲face-time. 只要有心連繫，其實天涯若比鄰。

朋友？唔同既whatsapp group 聯繫住唔同既朋友圈子，雖然無得見面，不過仍然可以知道朋友間有咩重要事發生，而且，仲有facebook 睇到唔同朋友仔去左邊到玩，某某人個仔返學了，另一個朋友既仔學爬了。現在和朋友之間溝通，和在香港都無咩分別，大家一樣照傾計，係差一點點時間，當他們早上己傾完一輪我地先起身。而英國的晚上，香港的朋友又己睡覺了，傾計時間通常就係香港的下午至晚上。

娛樂？我地係hk 時都無睇電視，黎到反而成日睇Netflix, 聽歌有kkbox, 一d 都唔會悶呀。而因為英國學校比較輕鬆，放學後，放假都可以無憂無慮咁去玩，動物園，博物館，湖邊閒逛，草地踢波，踩單，不知幾多野玩。單身人仕可能會覺得難適應，始終英國商店比較早關門，星期日好多店舖只開幾小時，不過對家庭來說，始終要遷就小朋友睡覺時間，又沒有工人姐姐，四大長老幫手，根本就無可能去街去得夜。通常去玩，食完晚飯都要回家，因為若去倫敦或其他城巿玩，食完晚飯回家都可能９點多，兩兄弟都己經在車上睡著了。

英國天氣差？其實英國夏天天氣好好，通常陽光普照，而且溫度唔會太高，30度以上的日子, 10隻手指數得晒 , 最啱出去玩，不過今年因為疫情無得四圍去。而冬天的確係成日落雨，不過咁凍，都係室內架啦，落雨同早天黑又有咩關係？唯一係小朋友放學後無得好似夏天咁，去公園玩到食晚飯。

交通不便？？係架，所以我專登係香港學定車，現在去買樽奶都要渣車，之前覺得去邊都要渣車出入有d 煩，不過現在覺得好方便，一出大門就上車，落車就可以去買野食野，買完放上車，轉眼又到家門口，慢慢再搬入屋。就算打風落雨落雪都唔怕。買到成車野，都可以慢慢由後尾箱一袋，一袋搬入屋，完全唔怕拎到手軟，仲會想搭公共交通？

購物？英國購物無香港咁方便，尤其若不是住在大城巿，但現在科技太方便，Amazon 什麼都有，各大品牌又有Online store, 足不出戶己可買起全世界。若不喜愛英國貨，網上還可以買唔到同國家既衫褲鞋襪，食品，用品，不怕沒東西買，只怕沒錢買！！

香港新聞？？現在一部手機己可以睇到全世界新聞，擔心什麼？只怕沒有足夠時間睇新聞吧！

驚英文溝通唔到？好多野，都係習慣。如果你能用英文去自由行，為什麼不能在英國生活？生活，來來去去，都係食野，買野，和人傾計。聽得多，講得多，自然會進步，唔明白，問下人，查下字典。現在電話上網咁方便，一查就知中文係乜，有心去學，聽，講，自己可以溝通到。

現在科技咁發達，同十幾廿年前完全係兩個世界，現在諗住去英國既人，都唔會完全唔識英文，唔同以前d 人只可以留係唐人街過日子，所以，有咩特別野要適應呢？？

最緊要，應該係調節自己既心！離開香港，去一個陌生地方生活，一開頭，一定會有Ｄ野唔慣，不過，你願意接受英國的一切，覺得移民係對一家人都好，自然就能慢慢習慣。

如果未曾到過英國，找一個長一點的假期來試住一下，移民前，要首先喜歡呢個地方。若一開始己覺得是逼於無奈才來英國，或者因為現在移民沒什麼成本，又或者因為人人講移民所以我移民，咁其實餘下的生活都唔開心，咁不如唔好勉強。但如果一開始就抱著因為喜歡，所以移民，整件事就唔同晒。所有野，都係由心出發。

閱讀分享Youtube Channel Teddy Bear's Story Time <-- 喜歡閱讀作品分享的話, 請訂閱頻道, 謝謝

近期推薦

📖英語會話系列

📖英語詞彙系列
📖生活化獨立小故事

📖聖誕故事特集

📖英雄系列