十個移民既香港人,
九個都係因為小朋友
講真, 今時今日移民既人,
有邊個係香港唔係搵到少少錢
一係人工不錯, 高薪厚職
一係做下生意, 搵到少少
成家移民到英國, 好多人都係黎到先搵工,
或者來英國創業
由穩定的生活, 變得充滿未知數
如果唔係為小朋友
駛乜搞咁多野??
如果我沒有小朋友
大概現在還在香港努力工作中
雖然對香港好不滿
但, 要離開的決定一定無咁大
有時, 移民就是靠那一點決心
回到正題
既然移民係因為小朋友
當然好緊張佢地既學業
好多朋友問移民問題,
第一句就問揀咩地區, 揀咩學校好
首先, 如果不用理會工作地點
英國咁多個城巿,
每一個城巿都一定最少有一兩間好學校的
選了自己喜歡的城巿先
跟住研究呢個城巿邊間學校比較好
而邊間學校比較好, 又會細分為中學, 小學
我自己認為,
英國的小學只要係Good 或Outstanding, 都可以參觀一下
唔一定係Outstanding 先好
有時學校既環境, 設備, 老師, 同學好唔好, 對仔女影響更大
參觀完唔同學校, 睇下自己喜歡邊一間多D
如果參觀時己有時間表申請移民, 可以問下學校有無插班位, 基本上你講小朋友幾大, 學校就知有無空位, 如果有, 間學校又鐘意, 記得Mark 低之後搵屋要搵學校附近
雖然今日有位, 唔代表你申請時個位仲係到, 但至少機會大D, 同埋證明佢無Waiting List
(英國既學位流動比香港大好多, 因為好多時若家長轉了工, 公司在另一個城巿, 就要舉家搬屋, 那就要轉校, 可以學校不時有學生插班, 又不時有學校轉走, 係英國係好平常的)
我在未申請移民之前, 來了英國兩星期考察,
去唔同城巿親身感受下
當你親身去過, 住幾日你就會知自己第日想住邊一個地方
記住, 你係諗住長住, 唔係旅行,
所以最好約地產睇下屋, 租盤賣盤亦可, 起碼知下行情
去下D 住宅區睇下環境, 附近有咩配套 (如公園, 細超巿, 藥房, 外賣店, 泊車住充唔充足)
預約參觀學校
(未有VISA 前其實己經可以參觀學校, 我地第一次黎英國時參觀了十多間小學, 當時完全未開始申請, 只是在Email 說會搬去英國住, 想參觀學校)
綜合晒唔同城巿既優點, 缺點之後, 就會知道想搬去邊個地方
決定左城巿後, 就開始研究呢個城巿邊間學校好
第一步, 可以先參考之前呢篇 移民前的準備 – 搵學校
https://jcinuk.blogspot.com/2018/10/blog-post_20.html
列出呢個城巿不錯的幾間學校之後
可以係Facebook 搵呢個城巿既Page,
入面通常有好多家長, 可以問下
XXX & YYY & ZZZ 邊間好D
就會有好多讀緊既家長回覆
真實用家Comments 比Ofsted Report 更值得參考
到時候, 應該會有兩三間學校彈出,
之後, 開個Google Map, 睇下學校位置係邊
研究你要住邊一個Area 先入到??
小學的Reception, 中學的year 7 都是向Council 申請, 等Council 派位
Council 的做法, 一般是學校首先收有兄弟姐妹讀緊的學生
之後是收有特殊需要的學生
最後, 就是計學校門口至屋企既直線距離
所以, 基本上只要住得夠近學校, 就一定會入到
至於要幾近先入到, 可以上 https://www.192.com/schools/
Search 間學校, 就會睇到過去5年既收生距離去到有幾遠
正常來說, 在最短距離那一年的範圍內都安全的
以上, 是以正常程序報考學校的必收策略
如果來到英國時要插班??
首先, 如果小朋友是要插小學, 留意幾時要報中學
因為Year 7 報名日子是year 6 時的10月31前
錯過左呢個日子, 就要等Council 派晒位之後, 還有位可以派給後補小朋友了
所以如果是year 6 在10月31 後插班, 時間上就比較麻煩了, 可以的話, 請早一年半載到英國
所以, 如果有心帶小朋友來英國讀書
想入到理想中學 (其實我覺得間間小學唔會差好遠, 反正都係基礎課程, 返學都係玩多過讀, 愉快學習, 反而上中學就真係正式讀書)
最遲Year 5 就應該要在英國插班, 這樣一來, 一升上Year 6 就可以立即和其他Year 6 小朋友一齊報中學, 可以確保入讀心儀中學
當然啦, 如果你問我, 當然係越早到英國越好啦,
佢地係英國讀書時間越長, 根基就更好,適應得更好, 和朋友一起長大係唔同D 架
如果小朋友還細, 只是初小, 先揀一間喜歡的小學, 之後再研究中學
若心儀中學和現居地比較遠
最遲在Year 6 開學前搬家, 那Year 6 一開學就可以用新地址報心儀學校了
萬一, 小朋友到英國時己是中學生呢??
通常一個town 既中學相比小學會少好多間
(小學比較細間, 學生小D, 中學比較大間, 學生多D, 通常幾間小學升去一間中學)
可以的話, 每一間都Send Email 去問一下有無位
參觀完覺得OK 就快快租屋先, 再向Council 申請學位
要記住, 呢個世上, 無完美學校, 只有適合的學校
人地口中好好的, 未必一定啱自己小朋友
親身參觀一下再比較
如果小朋友不小, 可以帶他一起參觀, 問一下他的感覺
如果對報英國學校程序有問題, 可以留言或來信傾下
但唔好問我XXX 學校好唔好, 我只識屋企附近學校, 再遠就無研究了
以下是過往文章大合集, 若對移民英國有疑問, 可以先看以下文章有沒有想知既資料
移民英國, 最常見問題 (英國簽證, 移民前後準備, 英國生活大全集)
==================================================================
如果大家想我多D 分享唔同既英國資料, 如英國生活, 或移民顧問資料, 可以Email 比我
Email : jcinuk2018@gmail.com
請留低
姓名
電話
以上只係個人分享, 並不構成任何建議
==================================================================
更多英國生活分享 https://www.facebook.com/JasperXJayden/
沒有留言:
張貼留言