上一篇結集左唔少讀者問題
經過幾日, 又有唔少有趣問題:
1) 可以帶幾多現金/金器去英國?
現金, 可以帶1萬歐元等值的CASH 去英國, 即大約9100 英鎊
不過, 大家要留意, 英國的最大額紙幣係50鎊, 若你打算拎 9100英鎊來英國, 即要拎 182 張50鎊。但，英國人係絕少拎50鎊出門, 好多人可能一世都無見過50鎊, 小店未必收。即使超巿，大商店肯收，好多時都要搵高級職員，驗屍咁驗，根本無可能拎咁多張50鎊去英國, 而且, 拎住咁多錢, 萬人被人偷左就大件事。
所以，最理想做法，在香港兌面額10 / 20 鎊的紙幣 (要求銀行給你10/20鎊, 講明唔要50鎊)，開啟海外提款功能，再加上用信用咭，應該就足夠短暫在英生活。
同時，大家可以在香港銀行先兌換英鎊，在開到英國銀行戶口後，直接把錢匯到英國。不一定要在HSBC 等銀行開, 其實香港任何銀行都可以把錢匯到任何英國銀行戶口, 用E-BANKING 的話, 費用應該不超過HKD100。若不是經常要把錢匯到英國，其實這個手續費不算貴。當然，還有其他網上銀行可以做兌換／匯款服務，可以自行查詢哪一個方法最抵。若只是一年一次，或不是經常要把錢匯到英國，用銀行的電匯其實比較方便。
金器，貴重珠寶
其實英國入境時沒有特別寫明可以帶多少金器，珠寶入境，不過若價值太高，而海關覺得你的東西是會轉賣，就有可能收VAT。就好似你去旅行，你帶頸鍊，戒子，手鍊，海關當然唔會理你，但若你帶一大盒珠寶，就好難向關員解釋用途。而且，在飛機上，亦有風險會被偷。
理想做法：
Ａ）在香港開銀行保險箱
Ｂ）放在家人香港的家（放在香港，絕對比放在英國的家安全）
Ｃ）在英國開銀行保險箱
若打算在英國開銀行保險箱，首先要留意附近有哪一間銀行提供此服務，第二，最好分開帶過英國。每次帶一部份過來，不要把全部金器，首飾一次過帶上飛機。
2) 若想9月開學, 應該幾時到英國
好多家長都有呢個疑問, 不過, 在英國插班, 無話一定要9月一開學就插班。其實當你什麼時候到英國，有地址後，交了Council tax, 有Council Tax No 就可以申請。若你揀的學校有位，大約２星期便可以正式上學。
若你希望９月和其他小朋友同一天開學，那就要暑假前到英國，完成申請學位手續。英國小學大約是７月中放暑假，因為申請學位最快要２星期，故遲６月底前申請。若你需要到英國後才找地方，租屋最快要１個月才可以取鎖匙（睇屋一星期，make offer & reference check 2星期, AGENT 預備租約, 簽租約, 取鎖匙1星期) 呢個時間係最順利既情況, 若遇著業主唔肯租, 或有其他原因, 時間可能仲會再拖耐D
3) 入讀政府學校要唔要交學費?
只要合法居住在英國(不計學生簽證) 便可以免費入讀政府小學，中學。英國小學由4歲開始，至16歲在英國都係強制教育, 所以只要係16歲前, 都可以讀書。16歲後, 若可以繼續讀中學( sixth form ) 都一樣係免費
而且英國讀政府學校, 不用買書, 不用付任何雜費。唯一支出，係買校服，每日午餐，以及偶而的Field Trip
4) 英國學校有無課外活動?
有的 (應該大部份都有吧, 請自行查詢心儀學校), 通常會有運動 如足球, 網球, 還有射箭, 跳舞, 畫畫,音樂, 砌LEGO, reading, Cooking 等等, 唔同學校會有唔同興趣班, 可以向學校問下
除左學校的課外活動, 還有不少私人的興趣班, 好似有唔同樂器, 足球, 網球, 游水, 騎馬, 羽毛球, 柔道, 劍擊等等, 想了解多D, 最好問下當地人, 有人介紹最好, 否則, 好多CITY / TOWN 都有facebook group / page, 問下當地媽媽最方便
但和香港唔同, 英國小朋友D 興趣班真係興趣為主 (升小學也好, 升中學也好, 主要都係睇地址), 而且小朋友3點幾放學後, 基本上回家都無野做, 有返一兩個興趣班, 放學無咁悶
5) 英國興唔興補習?
英國返學雖然比香港輕鬆好多, 但當然, 都一樣有補習, 不過應該唔算好多小朋友去補習, 而且華人比較多, 而白人係明顯比較少。英國都有補習社，出名既有公文式，Explore learning, First Class Learning 等等。
我地有參觀過公文式同Explore learning, 最後揀左Explore learning (今年3月時, 因為疫情停左, 直到現在都未重新JOIN 返, 英國疫情越來越差, 其實補習社應該都未開返)
公文式主要集中操練, 我地去過家長中, 小朋友去到, 全部人係一個HALL 到做練習, 有唔明就舉手問, 否則自己做完, 再回家做功課
我地唔係太鐘意呢個模式, 如果小朋友己中學, 其實都OK 既, 但考慮到弟弟咁細, 咁集中操練對佢無乜好處, 佢亦唔會想返
Explore learning 係一星期2次, 每次個半鐘, 入面有英文和數學練習, 主要係用電腦做練習, 弟弟會加埋練寫字母。回家都可以用電腦做練習。練習比較有趣，至少佢地去上堂係覺得開心，Ｄ職員好識對小朋友，弟弟扭計都可以氹到佢。而哥哥就集中練習11+, 都教得幾細心, 每3個月有一個parents day, 講返小朋友進度
除了補習社, 還有不少私人補習, 最多係英文, 數學。上了中學，除了英數外，其他科都會有，包括中文，邊個弱就補邊科，因為GCSE / A-Level 都需要有好成績嘛
6) 為什麼去到英國都要補習?
哥哥到英國時己是Year 4, 讀左2個月就升Year 5，英文既程度和本地小朋友始終會差Ｄ，所以希望佢練習下英文, 可以追上同學既程度。而且，因為基本上無乜功課，放學到訓覺之間有５小時左右，扣除晚餐和沖涼，還有４小時，每星期去兩次補習，都仲有大把時間玩，睇電視同睇書。至於弟弟，一來陪下哥哥，二來，佢既Phonics 都可以加強一下。
7) 英國冬天係咪好難捱？
我地黎之前都有聽過英國冬天好難捱，日照短，又成日落雨。
我地經過左一個冬天之後, 都唔係想像中咁差。當然，相比起暑假可以去公園玩到８點，冬天４點天黑，又凍，當然無晒戶外活動，不過其實因為室內有暖氣，在家其實溫度好舒服。而且冬天有好多聖誕節活動，又有長假期，小朋友過得好開心。
8) 英國係咪好多搶野?
都幾多人關心治安問題。如果你住係一個正常住宅區，應該好少搶劫吧？至少我沒有聽講過遇到／見到有搶劫。遊客區應該會比較擔心Ｄ，但正常住宅區區，連小學生都可以自己行返學／屋企，街上既人都係拎住電話邊行邊用，就知唔駛太擔心。
如果你心水地方治安麻麻，就好好考慮係咪揀另一個地方了
9) 現在疫情嚴重，擔唔擔心？
無辦法，唯有自己小心Ｄ。現在英國每天幾千單，小朋友要返學，但無人戴口罩，其實都好無奈。現在除了學校和超級市場，盡量都唔會去其他地方。但小朋友返學反而最大風險。連老師，教職員都無人戴口罩，真係唔明點解覺得病毒唔會進入學校。但小朋友又不能長期唔返學，所以，只能叫小朋友休息多Ｄ，一回家一定要沖好涼先可以做其他野。
10) 戴口罩會唔會被歧視?
其實在英國, 在商店, 公共交通等等都必須戴口罩, 所以戴住口罩都唔會被人歧視，而且他們自己入商店都要戴。當然，如果有人又戴口罩，又戴面罩，眼罩，的確會比較多人眼望望，但自己覺得安心就好，而且，我估多數係覺得好奇比較多。
通常英國人戴口罩，真係入店前才戴，一出門口就除，而且，好多時都見到佢地亂咁戴，只能叫做好過無。
今次講住１０個問題先，若有其他疑問，都可以留言問下
